ДАЛИ СЕ ОТКАЖУВААТ ОД БОИНГ ПОРАДИ ВИСОКИТЕ ЦАРИНИ? Рајанер планира да купува авиони од „Комак“

Ирската
авиокомпанија „Рајанер“ ќе го откаже купувањето авиони од „Боинг“ и ќе купува
од други компании доколку американските царини значително ја зголемат цената на
авионите, изјави извршниот директор на компанијата, Мајкл О’Лири.

О’Лири напиша во
писмо, до кое имаше увид Блумберг, како одговор на предупредувањето од
американскиот конгресмен Раџа Кришнамурти, демократ од Илиноис, кој рече дека
американските и европските авиокомпании не треба да купуваат авиони од
кинескиот производител на авиони „Комак“ од безбедносни причини.

Извршниот
директор на „Рајанер“ претходно ја изнесе идејата компанијата да купува авиони
од „Комак“ доколку цените на нивните авиони бидат пониски од оние на „Боинг“
или „Ербас“.

Во писмо до
Кришнамурти, О’Лири ги критикуваше царините што ги наметна американскиот
претседател Доналд Трамп, кои предизвикаа загриженост во воздухопловниот
сектор, кој во голема мера е заштитен од царини уште од договорот од 1979
година.

„Рајанер“ управува
со повеќе од 600 авиони „Боинг 737“.