Дали ќе плаќаме поскапа струја зависи од тоа дали Владата ќе дозволи фер трка за универзален снабдувач
Профитна маржа од 11,5 проценти па надолу е главниот услов во јавниот повик за Универзален снабдувач на електрична енергија за домаќинствата и малите потрошувачи.
Првиот човек на ЕДС Милтиадес Бабилис, компанија која изрази интерес за повикот, во интервју за Фактор вчера изјави дека на овој повик ќе понуди значително пониска профитна маржа од предвидената, што ќе значи и пониска цена на струјата која што ќе ја плаќаат граѓаните.
Но, дали ова ќе влијае на веќе неофицијално донесената одлука на Владата за избор на ЕВН за Универзален снабдувач на електрична енергија или одлуката како и во поголем број случаи ќе биде политичка, ќе се знае по завршувањето на тендерот, пишува А1он.мк.
Од ЕДС очекуваат максимално транспарентна постапка во јавниот повик за избор на Универзален снабдувач и велат дека изборот на нивната компанија ќе донесе нов квалитет на пазарот и сериозна придобивка за домаќинствата.
„Согласно законите за јавни набавки и енергетика зад ЕДС стои корпоративниот углед, но и активата на ППЦ. И токму она што е најголем интерес на граѓаните, го имавме ние како компанија предвид при подготовката за овој повик. Јавноста треба да знае дека нашата понуда ќе биде многу конкурентна и со пониска маржа и затоа не сакаме да веруваме дека со политичка одлука може да се спречи поевтина струја за граѓаните, вели Бабилис.
Но, како што пишува А1он.мк, доколку неофицијалната одлука на Владата остане иста, односно повторно биде избран ЕВН за Универзален снабдувач на електрична енергија, според експертите ќе значи обесхрабрување на сите потенцијални странски инвеститори да инвестираат во земјава.
Тие порачуваат дека ваквиот начин на водење на тендерска постапка, кога однапред во јавноста се знае кој ќе го добие тендерот праќа многу лош сигнал за странските инвеститори кои се повеќе ја заобиколуваат Македонија, а оние кои што се присутни во земјава се се помалку задоволни од условите за водење бизнис.
На јавниот повик, освен ЕВН Хоум, се пројавиле неколку компании, но како најсериозна конкуренција доаѓа компанијата ЕДС, зад која стои грчката ППЦ која пак има годишни приходи од близу 11 милијарди евра и има свои претставништва во повеќе земји низ југоисточна Европа.
Тендерската постапка е во тек и ќе трае до 12 јануари.
Извор: А1он.мк
