Дали е ова најдобро платен градежник во Македонија? Лани остварил 159.000 бруто приход!

Градежништвото во Македонија е конјуктурен бизнис особено неговиот сегмент – изградба на згради за колективно домување. Токму заради тоа во јавноста постои уверување дека градежниците добро заработуваат. За жал, кај нас нема регистар за успешност и уште владее „традицијата“ платите и заработките да се кријат како што змијата ги крие нозете. Иако во развиениот свет токму тие се параметар за успешност и општествени статус и несе кријат. Сепак има и похрабри кои приходите не ги кријат. Еден од ретките кои транспаретно ги објавија своите лански приходи е Фатмир Етеми. Неговиот вкупен бруто приход лани изнесува речиси 160.000 евра

Фатмир Етеми е успешен стопанственик, во јавноста познат како сопственик на градежната компанија „ЗСФ КОМ“ која е специјализирана за градба на згради за колективно домување.

Овој успешен бизнисмен има и други инвестиции, а членува и во два надзорни одбори. Официјалните податоци достапни во годишниот ивештај на „Комерцијална банка“ покажуваат дека овој член на нивниот Надзорен одбор лани приходувал 159.350 евра во бруто износ од свои материјални надоместоци и права од договори за работа (како што е наведено во описот даден во извештајот на банката).

Тоа значи дека неговиот нето приход лани надминува 100.000 евра. Дали е тоа најдобро платениот градежник во земјава? Не можеме да потврдиме ниту да одречеме, затоа што другите ги кријат своите приходи. За жал во Македонија уште владее искривената култура според која успешните луѓе не зборуваат за тоа колку заработуваат иако тоа го прават посветено и чесно, а при тоа обезбедуваат егзистенција и за бројни семејства на вработените во компаниите кои ги водат и поседуваат.

Најголем дел од приходите на Етеми се од неговата плата која ја прима како управител на „ЗСФ КОМ“. Со мал дел (не надминува 15% од приходите) учествуваат неговите месечни надоместоци од членство во барем два надзорни одбори и тоа : „Скопски пазар“ и „Комерцијална банка“.

Етеми станува член на Надзорниот одбор на „Комерцијална банка“ во септември 2018 година. Тогаш неговата компанија и прв пат купува акции во „Комерцијална банка“. Сега Етеми го тера својот втор мандат кој трае четири години. Етеми преку „ЗСФ КОМ“ контролира над 3 отсто од акциите со право на глас во „Комерцијална банка“. Од своето членство во Надзорниот одбор прима месечен надомест во вредност на една просечна нето плата на вработен во таа банка.

Најпознат во јавноста е по својата градежна компанија ЗСФ КОМ, каде е основач и управител. Според официјалните податоци за 2021 година оваа градежна компанија остварила приходи во вредност од 19 милиони евра, а нејзината добивка на крајот на таа година била 5,4 милиони евра.

Преку својата градежна компанија Етеми е акционер и во „Скопски пазар“ најголем оператор со отворени зелени пазари во главниот град на Македонија. Во таа компанија фирмата на Етеми поседува 38,7 отсто од акциите со право на глас. Етеми е член на Надзорниот одбор на „Скопски пазар“.

Р. Ф.