ЦУНАМИТО ОТКАЗИ ОД ГУГЛ, МАЈКРОСОФТ И ЕПЛ СТИГНА И ВО СРБИЈА – голема ИТ компанија мораше да отпушти 200 вработени, ова е нивното објаснување
Со месеци наназад ширум светот фрчат откази во ИТ секторот. На првата линија се програмерите, кои беа отпуштени преку ноќ во Microsoft, Apple, Meta и други технолошки гиганти. Бранот оставки ја преплави и Србија. Така, една компанија која работи во таа земја отпушти 200 работници.
Социјалните мрежи ги шират искуствата на луѓето кои биле вработени во ИТ секторот, а потоа наеднаш останале без работа.
Од почетокот на годината и медиумите се преплавени со вести за тоа како технолошките гиганти, како Мајкрософт и Мета, масовно ги отпуштаат своите вработени.
Се покажа дека вакви сценарија не се случуваат само некаде далеку, бидејќи истото им се случило на работниците во Србија.
Глобалната компанија HTEC Group, која работи и во Србија, мораше да го намали бројот на вработени. Ова за Нова.рс го потврдила Кристина Урошевиќ, директор за комуникации во таа компанија.
„Ситуацијата на светскиот ИТ пазар е исклучително предизвикувачка, што го покажуваат големиот број отпуштања во водечките светски технолошки компании, а за жал, ефектите од кризата се прелеаа и на регионалниот пазар“, вели таа.
Според неа, HTEC Group на почетокот на годината воведе низа мерки насочени кон рационализација на трошоците и зајакнување на тимовите кои работат на развој на нови деловни можности.
Урошевиќ понатаму наведува дека било неопходно да се реорганизираат деловните единици.
Според неа, во оваа компанија имало инженери кои извесно време не биле вклучени во проекти и чии знаења и вештини, како што вели, не биле соодветни за областа на раст што ја очекуваат во наредниот период.
Така, 200 работници останаа без работа. Тоа е седум проценти од организацијата.
„Покрај реорганизацијата на функционалните единици, пренасочувањето на луѓето и преквалификацијата, за жал, овој процес на реорганизација и оптимизација опфати околу 200 вработени со кои моравме да се разделиме“, велат од компанијата.
Сепак, од HTEC Group тврдат дека прават се што е во нивна моќ да ги поддржат отпуштените работници во нивното понатамошно професионално патување.
Инаку, компанијата забележа раст на приходите од 30 отсто во првиот квартал од годинава.
„Иако ова е солиден резултат, тој е под очекуваното ниво и амбиција на компанијата“, велат од компанијата за Нова.рс.
Инаку, HTEC Group е глобална компанија со седиште во Сан Франциско, додека вработува повеќе од 2.000 луѓе низ Централна и Југоисточна Европа. Исто така, компанијата има капацитети во Силиконската долина, Њујорк и Лондон.
Извор: Нова.рс
