Црвен крст досега исплати 107 милиони денари за повредените во Кочани
Добро е што сите институции и организации вклучени во менаџирањето на кризата по трагичниот пожар во дискотеката „Пулс“ во Кочани застанаа зад иницијативата хуманитарната помош да се акумулира на едно место и да се распределува според реалните потреби, истакна генералниот секретар на Црвениот крст на Македонија, Саит Саити, на панел-дискусијата „Кочани е нашиот приоритет“.
Саити информираше дека досега се исплатени вкупно 107,4 милиони денари кон три категории корисници: семејствата на починатите, повредените кои се лекуваа во странство и оние кои се лекуваа во земјата. На солидарната сметка на Црвениот крст остануваат уште 49 милиони денари.
– Средствата се исплаќани во шест наврати. Почнавме со 60 семејства на починати, а завршивме со 63. Исплативме 52 милиони денари за нив. За повредените кои се лекуваа во странство исплативме над 44 милиони денари, а за оние во земјата – 11,2 милиони, изјави Саити.
Тој нагласи дека преостанатите средства ќе се распределат по детална евалуација на здравствената состојба и потребите на повредените, додавајќи дека нема да има линеарна исплата, бидејќи секој пациент има различни медицински трошоци и прогноза за закрепнување.
– Исплатата ќе се прави селективно и правично. Не може сите да добијат иста сума, бидејќи тежината на повредите не е иста, рече Саити.
Црвениот крст останува координациски центар за сите донации и хуманитарна помош поврзани со трагедијата, а Саити ја изрази благодарноста до сите граѓани, компании и институции кои покажаа солидарност во најтешките моменти.
