Црна Гора во иднина ќе го повлече признавањето на Косово?
Црна Гора би можела да го повлече признавањето на Косово, но дури по влезот во Eвропската Унија (ЕУ).
Ова го тврди Жаклин Настиќ, пратеничката на левицата во германскиот Бундестаг, додавајќи дека не ја исклучува можноста тоа да се случи дури кога земјата ќе стане членка на ЕУ, пренесува „РТ Балкан“.
Во опширно интервју за подгоричката „Адрија ТВ“, Настиќ вели дека повлекувањето на признавањето на Косово ќе ѝ создаде на Црна Гора пречки на патот кон ЕУ.
„Морам да признам дека не верувам оти Црна Гора ќе го повлече признавањето на Косово во блиска иднина. Како членка на НАТО и кандидат за влез во ЕУ, со големи шанси да стане членка на Унијата, повлекувањето на признавањето би ѝ создало пречки на патот. Ова неодамна го потврди новоизбраниот претседател Јаков Милатовиќ. Можно е повлекување на признавањето, но дури по влезот во ЕУ. Сепак, и многу членки на ЕУ сè уште не го признаваат Косово, вклучувајќи ги Шпанија, Грција, Романија, Кипар и Словачка“, вели таа.
Настиќ не верува дека Германија ќе го смени ставот кон Косово во блиска иднина.
Србија по дипломатски пат настојува што повеќе земји да го повлечат признавањето на Косово. Дури шефот на дипломатијата, Ивица Дачиќ претходно објасни дека на државите кои имаат проблем со сепаратизам им објаснуваат како стојат работите со Косово.
