Чисти чаршави ќе има: Исплатен дел од старите плати на вработените во пералната на Клинички!
Чисти чаршави најверојатно ќе има на Клинички центар „Мајка Тереза“ -Скопје откако исплатени се платите на вработените во Пералната.
Од компанијата која управува со пералната, „СкопСтер“ велат дека денес е исплатен дел од старите плати на вработените, а интензивно се работи на краткорочни мерки за обезбедување финансии и исплата на заостанатите плати.
„Во таа смисла, ги земаме предвид и обврските од Службата за Општи и Заеднички Работи (СОЗР) и веруваме дека како и во овој случај, со заеднички сили ќе изнајдеме решение со кое вработените ќе добиваат плати навремено. Дополнително, веруваме дека СОЗР исто така ќе има разбирање и навремено ќе ги реализира преостанатите обврски за 2024 година, како и тековните“, се наведува во соопштението.
Од компанијата велат дека јавно им се заблагодаруваат на сите вработени за разбирањето и потенцираат дека како компанија која управува со пералната, во рамки на долгорочната стратегија имаат готов проект за целосно реновирање и инсталирање нова опрема, со што сметаат дека ќе придонесат за унапредување на нивната работна средина и подобрување на здравствените услуги од овој домен.
