Бундестагот даде „зелено светло“ за новиот закон: Олеснет влез за работници од Западен Балкан
Германскиот парламент Бундестаг гласаше за реформирање на законот за имиграција на квалификувана работна сила и одобри продолжување на т.н. правила за Западен Балкан кои ја олеснуваат имиграцијата на работници од овој дел на Европа.
„Со овој закон, Германија го добива најсовремениот закон за имиграција во светот“, рече министерката за внатрешни работи Ненси Фезер (Социјалдемократската партија на Германија СПД) во дебатата пред гласањето. Таа рече дека сега најважен чекор е отстранувањето на бирократските пречки кои ја спречуваат имиграцијата.
Министерот за труд Хубертус Хеил (СПД) рече дека новиот закон е потребен за да се овозможи имиграција на широк опсег на квалификувани работници во економијата „а не само на академски образованите“ како што е случајот сега.
Најголемата опозициска група во Бундестагот, Христијанско-демократската унија ЦДУ/ЦСУ го критикуваше новиот закон за намалување на нивото на условите што во иднина треба да ги исполнуваат работниците кои доаѓаат надвор од земјите на ЕУ пред имиграцијата.
„Наместо да го отвори патот за експертите, федералната влада сега ги намали барањата за квалификации и јазични вештини. Ова не е вистинскиот начин“, рече потпретседателката на пратеничката група на ЦДУ/ЦСУ, Андреа Линдхолц.
Десничарската популистичка Алтернатива за Германија (AfD) смета дека на Германија не и треба повеќе имиграција.
„Не се многу малку луѓе кои доаѓаат во Германија, туку премногу луѓе кои не сакаат да се интегрираат“, рече пратеникот на АфД, Норберт Клајнвахтер.
Бундестагот го донесе законот со гласовите на претставниците на владејачката социјалдемократска-зелено-либерална влада. Претставниците на Унијата ЦДУ/ЦСУ и АфД гласаа против законот, додека претставниците на партијата Левица беа воздржани од гласање.
Новиот закон, направен според моделот на имиграциските земји, како што се Канада и Австралија, предвидува воведување систем на бодување кој ќе ги оценува аспектите како што се квалификациите, познавањето на германскиот јазик, возраста и работното искуство.
Новиот закон ќе им овозможи и на квалификуваните лица кои поднеле барање за азил во Германија полесно да се приклучат на германскиот пазар на труд.
Истовремено, зголемена е квотата за работниците кои доаѓаат во Германија како дел од т.н правила за вработување работници од Западен Балкан. Ова правило, кое беше воведено уште во 2016 година, овозможува доаѓање на работници од шест земји во овој регион врз основа на договор за вработување со германски работодавач, а не по квалификации. Сега квотата за овие работници е зголемена на 50.000 годишно.
Реформата на законот за имиграција на квалификувани работници е дел од сеопфатната реформа на законот за странци, кој меѓу другото го вклучува и законот за полесно стекнување државјанство.По доаѓањето на власт, владата на канцеларот Олаф Шолц најави модернизација на голем број закони кои се однесуваат на имиграцијата и странците кои живеат во Германија.
И покрај значителниот број имигранти од земјите на Европската унија и над два милиони бегалци кои дојдоа во земјата за време на војната во Сирија и Украина, на Германија и требаат стотици илјади квалификувани работници на долг рок.