Бојан Јовановски: Врз мене се врши незапаметена тортура од Кривичен суд
Бојан Јовановски – Боки 1, кој доби 9 години затвор за случајот „Рекет“, се огласи со соопштение во кое тврди дека врз него се врши „незапаметена тортура од страна на Основниот кривичен суд Скопје“ од кој барал прекин на издржување на казната затвор поради влошена здравствена состојба од животно загрозувачки карактер. место тоа, како што тврди, добил фалсификувано решение.
-Наместо законита одлука темелена на докази, добив судско решение за кое изразувам основано сомневање дека е фалсификувано и антидатирано под директна наредба од претседателот на Основниот кривичен суд Иван Џолев. Судското решение кое е со датум од 31.1.2023 не е потпишано од страна на починатиот судија Огнен Ставрев, дотолку повеќе што се гледа потпис со апостроф кој не коинцидира со потписот на покојниот судија. Оттука се наметнува прашањето – заради кои причини судијата кој бил на работа до 3.2.2023 година, пред да почине на 4.2.2023 година, не го потпишал решението кое го донел и заради кои причини веднаш не го верифицирал истото во акмис системот согласно закон и судкиот деловник за работа? Важно за напомена е дека покојниот судија се до 3.2.2023 година беше во активна и секојдневна комуникација со мојот бранител Владимир Туфеџиќ во врска со постапката и истиот примаше дополненија на барањето и нови докази“, пишува во реакцијата на Јовановски.
