Бизнис планот не е „глупост“
Како да се поттикнат претприемачите да го
направат првиот чекор кон отворање сопствен бизнис и на што треба најмногу да
посветат внимание. Со развивање на став и претприемничко однесување, развој на
менаџмент и бизнис вештини, развивање на висока цел која е поврзана со личните
интереси и пасии, а ќе продуцира вредност на оштеството, се првите чекори кои
треба да ги направи еден претприемач при отпочнување сопствен бизнис.
Покрај охрабрувањето да се направи првиот чекор, неопходно е да се изработи
квалитетен бизнис-план кој ќе ги оцрта линиите на водење на бизнисот. Јован
Сталевски, меѓународен CEFE тренер и советник, досега има работено со стотина претпримачи на изработка
и усовршување на нивните бизнис планови, и ги открива основните постулати на
бизнис планирањето.
„Бизнис-планот е основа за започнување со работа, тој е
како GPS за претприемачите да стигнат од точка А до точка Б, што
значи дека им помага да не губат драгоцено време, водилка на која секогаш може
да се навратат и да видат каде грешат и што треба да променат“, вели Сталевски.
Бизнис планот за
претприемачите е GPS до успехот.
„Претприемачот треба да се потруди да истражи каква мапа му одговара да си
го најде патот, какви средства има, на што треба да внимава, какви препреки ќе
наидат, со кој може да се патува, колкава мапа треба да се направи, дали има
други споредни патишта направени од некој друг, дали некој ќе му го попречува
патувањето“, ја дополнува метафората.
Бизнис-планот не е глупост
Сталевски предупредува на новите трендови кои се шират на социјалните
мрежи, а кои поттикнуваат нерационално носење одлуки на бизнисмените, особено
кај т.н. бизнис гуруа.
„Доколку младите гуглаат или гледаат на Јутјуб, ќе ги видат Илон Маск или
други милијардери кои ќе речат дека бизнис-планот е „глупост“, но можам да се
обложам дека Маск за Тесла има бизнис-план кој генерира милијарди. Затоа е
добро да имаме бизнис-план како водилка којашто и да не се покаже правилна при
имплементирањето ќе има на што да се навратите и видите каде сте згрешиле за да
ги поправите нештата“, вели тој.
Квалитетен бизнис-план се базира на добро истражени податоци од самото
окружување на претприемачот поврзани со тестирање на неговите бизнис идеја,
потребата на пазарот, цените, конкуренцијата, регулативата и иновативниот
пристап.
Финансиската едукација е клучна за успех
Претприемачот е пожелно да ги знае основите на финансискиот менаџмент … или
ќе ги научи на потешкиот пат – со казни, долгови, изгубени пари, погрешни
проценки за цени и промоции и искуство платено во време и обиди.
„Делот од бизнис планот којшто е со бројки кога ќе
работи во реалноста тоа може да го чини многу пари и средства. Затоа треба да
го разбира финансискиот менаџмент, да ги разбира
приходите, расходите, какви се билансите во бизнисот, за да може ги измери
трендовите, на месечно, тримесечно или годишно ниво и да знае дали работи
успешно и ја оправдува целата инвестиција, енергија и време или треба нешто да
промени во концептот“, заклучува Сталевски.
Х.С.
