Битола во ќорсокак – европските при за канализација под ризик да се изгубат
Дали Македонија повторно ќе се соочи со ризик да изгуби европски средства? Овој пат неизвесноста се однесува на проектот за изградба на канализација во битолско, кој е дел од поширокото решение за управување со отпадните води и изградба на пречистителна станица. Иако властите неодамна потпишаа договор за изградба на станицата, договорот за канализацијата сè уште не е склучен, иако во Оперативната програма за животна средина јасно се нагласува дека двата проекта мора да се реализираат паралелно за да се постигне целосно решение.
„Очекуваните резултати се: 95.000 жители на Битола (до 2030 година) да бидат поврзани на сигурен канализациски систем каде што отпадните води се третираат на пречистителна станица што ги исполнува параметрите на ЕУ“, стои во програмата.
Експертите предупредуваат дека системите за канализација во Македонија се генерално дотраени, често неразделени за фекални и атмосферски води и со сериозни истекувања. Иако во урбаните средини каде што има рехабилитација состојбата е подобра, недоволната имплементација на европските директиви останува клучен проблем.
Европскиот акциски документ од 2022 година потсетува дека и покрај удвојувањето на капацитетот за третман, три четвртини од отпадните води во земјава и натаму се испуштаат непречистени.
Во меѓувреме, реката Драгор останува главен канал за отпадни и индустриски води, а ветувањата за целосно решение и натаму се одложуваат.
