Битиќи најави антимонополска акција против картелите со високи цени
Вицепремиерот за економски прашања Фатмир Битиќи денеска потврди дека имал работен состанок со претседателот на Комисијата за заштита на конкуренцијата за да се започне поширока акција против евентуалните картели кои во трговијата формираат неподносливи цени на производите за граѓаните.
– Ги изнесов моите согледувања и врз основа на тоа да постапат во одредените сектори за кои заеднички сметаме дека треба соодветно да се делува. Тоа ќе го направат во соработка со ресорните министерства, пазарниот инспекторат и сите други институции кои што можат да бидат повикани, рече Битиќи.
На состанокот се зборуваlo за ценовните движења во малопродажната мрежа на прехранбени продукти и постоењето на можности за присуство на трговски практики кои освен што ја нарушуваат слободната пазарна економија и конкуренцијата, носат и директна штета на граѓаните.
Вицепремиерот додаде дека акцијата ќе биде процес во кој не може да се очекува брзи резултати, бидејќи истраги кои алудираат на евентуално договарање на цени бара подолго време.
– Искуството покажува дека истрагите може да траат до една година, но првите резултати биле постигнувани веднаш откако започнала постапката. Ние алудираме на тоа дека имало планско здружување и сметаме дека имало одредено договарање на одредени трговци и други чинители кои нанеле штета и сметам дека тоа може да се поправи при самата постапка на КЗК, смета Битиќи.
Тој најави дека истрагата ќе започне за брзо време.
– Ќе започне најбрзо што е возможно. Јас сосема сум свесен за нивниот човечки капацитет и ресурси. Ќе треба да ги постават тезите за кои што денеска разговаравме за да можат да излезат на терен, а мислам дека тоа ќе го направат најбрзо што е возможно и соодветно на тоа ќе има реакција од сите, кажа вицепремиерот.
