Бислимоски: Ескалацијата на Блискиот Исток ќе влијае врз цената на нафтата во Македонија
Ескалацијата на конфликтот меѓу Израел и Иран веќе се одразува на светските берзи, а ефектите ќе се почувствуваат и во Македонија, предупредува претседателот на Регулаторната комисија за енергетика, Марко Бислимоски. Според него, првичните цени на бренд нафтата утринава се зголемени за шест до седум долари, достигнувајќи 78 долари за барел, што е прв ваков скок по неколку месеци стабилни цени.
– Апсолутно ќе има влијанија. Ќе видиме како ќе се одрази во следните денови. За следната недела не очекувам драстични промени при носењето на одлуката за цените, но доколку трендот на високи цени продолжи, ќе има влијание и врз цените што ги плаќаат граѓаните во Македонија – изјави Бислимоски од Охрид, каде учествуваше на меѓународната конференција „Иднината на комуналниот сектор“.
Тој изрази надеж дека актуелниот скок е само краткорочен пик, слично како при почетокот на војната во Украина, кога цената на дизелот достигна 110 долари за барел, но подоцна се стабилизира.
– Се надеваме дека ова ќе биде само еден пик. Како што се случи со Украина, и тогаш имаше зголемување, па цените се стабилизираа меѓу 65 и 68 долари. Овој пат утрово е 78 долари – додаде тој.
Во однос на другите производи, Бислимоски не очекува значајни поскапувања, но потсети дека поранешното зголемување на цените на нафтата предизвикало ланец на поскапувања што не биле коригирани со последователното намалување на цените на дериватите.
– Денеска дизелот е 66-67 денари, но производите кои поскапеа кога беше 110 долари не се вратија на старите цени. Затоа не верувам дека сегашната состојба ќе има драматично влијание врз останатите производи во земјава – заклучи првиот човек на РКЕ.
