„Бехтел и Енка“ направи добивка од 8 милиони евра од автопатите во Македонија, за вработен троши по 2.700 евра месечно
Конзорциумот „Бехтел и Енка“, изведувач на четирите нови автопатски делници од проектот Коридор 8 и Коридор 10Д, во 2024, односно во својата прва целосна година на работење, оствари добивка од 8 милиони евра, според податоците кои „Фактор“ ги обезбеди од Централен регистар.
По платениот данок на добивка, операторот остварил профит од 418.157.733 денари и со оваа бројка треба да се најде меѓу најуспешните компании по остварена добивка за минатата година.
Приходите за една година се зголемиле за повеќе од четири пати. „Бехтел и Енка“ наплатил 84 милиони евра, пари кои доаѓаат од Јавното претпријатие „Државни патишта“ како инвеститор.
Бројот на работници се зголемил за повеќе од седум пати. Минатата година била завршена со 1.014 работници. Инаку пред една година беше соопштено дека конзорциумот побарал помош за да обезбеди инженерски кадар и општи работници во вкупен број од 4.000 кој, според работодавачот, ќе биде потребен до завршување на проектот.
Според трошокот за вработени во завршната сметка, за работниците биле потрошени 33,5 милиони евра., што е околу 40 отсто од остварените приходи. Условно, ако оваа сума се подели на пријавените 1.014 работници, излегува месечно дека за еден вработен „Бехтел и Енка“ вложувал по околу 2.700 евра. Во завршната сметка нема податоци колку пари се потрошиле за основни плати, придонеси, додатоци, даноци, евентуални награди, обуки, престој или други трошоци за работниците.
На почетокот на годинава за да може Бехтел и Енка полесно да гради во земјава, беа предложени измени на Законот за странци, со цел повеќе да се олесни ангажирањето на странските работници кои ќе работат на изградба на предвидените автопатишта, односно да се даде поголем број дополнителни олабавувања и намалувања на критериумите за да се ангажираат странски работници, токму на барање на инвеститорот Бехтел и Енка.
Договорот со „Бехтел и Енка“ под стариот изговор дека има деловни тајни не беше објавен во јавноста ниту од новата власт, а единствено беше кажано дека се остава можност за репреговарање.
Sпоред последниот месечен извештај на „Бехтел и Енка“, изведувачот кој работи на проектот за поврзување на Коридор 8 и Коридор 10Д во Македонија, испратен до инвеститорот „Државни патишта“, се уште ништо не е започнато да се работи на еден од четирите автопати.
Од Требеништа – Струга – Ќафасан не е реализирана ниту една фаза, додека на останатите три делници работите се во прогрес. Официјалните градежни активности започнаа во март 2023, треба да завршат во декември 2027, но на овој автопат, според извештајот, не се започнати ниту геолошките истражувања, поради заштитните критериуми на УНЕСКО.
Јавното претпријатие „Државни патишта“ во програмата за работење за 2025 испланира вкупно 150 милиони евра за конзорциумот „Бехтел и Енка“. Од овие средства, 130 милиони евра се веќе предвидени во државниот буџет за оваа година за американско-турскиот оператор, а јавното претпријатие има уште околу 20 милиони евра непотрошени од претходните години кои дополнително ќе се префрлат, пишува во програмата.
A.K.
