БАРААТ ПОВИСОКИ ПЛАТИ ЗА 30 ОТСТО, ЗАСЕГА ПРОТЕСТОТ Е ПРЕДУПРЕДУВАЧКИ – вработените во УЈП го изразија незадоволството
Вработените во Управата за јавни приходи, преку својот синдикат, бараат зголемувбање на платите на вработените за 30 проценти. Вработените кои се членови на синдикалните организации во повеќе градови во земјава излегоа на протест, со цел, како што велат, да го изразат своето незадоволство бидејќи се изоставени од законското покачување на платите во Министерството за финансии. Барањето го имаат доставено и до работодавачот и до ресорниот министер.
„Не сме опфатени во толкувањето од член 66 од Законот за буџет кај што има покачување на плата од 30 отсто, сметаме дека како и сите други во состав на Министерството ни следи. Барањето е многу оправдано базирано врз податоци статистички за покачување на кошницата на трошоци и сите други инфлациони параметри и сите други параметри шт се основ за синдикатот да бара а тоа го предвидува и колективниот договор дека треба да се коригираат врз бара на тие параметри и нашите плати“, изјавил за ТВ Телма Агрон Емини, повереник на Синдикатот при Синдикална организација на УЈП во Тетово.
„Веќе од август лани преговараме за платите бидејќи навистина од 2009 година не се помрднати, во стварност имаше некое поместување само од 5 отсто за последните 14 години. Цените драстично пораснаја и стварно со овие плати УЈП не заслужува да функционира вака како што е“, вели Тони Петровски, член на Синдикалната организација на УЈП Битола.
Протестот беше во траење од час и половина, но доколку не бидат исполнети нивните барања најавуваат порадикални чекори, односно штрајк.
Во УЈП има над 1.000 вработени на ниво на цела Македонија.
Фото: Принтскрин ТВ Телма
