Бачев и други челнови од Единствена Македонија добија црн печат за влез во Грција
Единствена Македонија реагира на вчерашната мерка на Грција за одбивање влез на граница и изрекување тригодишна забрана за влез и за Емилија Гелева претседателката на Унијата на жени на Единствена Македонија и членка на Извршниот комитет на партијата.
Потсетуваме, пред една недела, на 17 јуни беше одбиен влез и на пошироката делегација на Единствена Македонија која одеше во Нивици, Беломорска Македонија по повод петгодишнината од склучувањето на т.н преспански договор и притоа на претседателот Бачев и членови на партиското раководство исто така беше изречена тригодишна забрана за влез во Грција.
Ова веќе станува тенденција во однесувањето на Грција. Државите како субјекти на меѓународното право и членки на меѓународната заедница имаат определени права и обврски. Република Македонија има меѓународно правно-признато право и обврска да ги заштити своите државјани од незаконското постапување на трети држави.
Затоа, македонското министерство за надворешни работи треба да го повика грчкиот амбасадор во Скопје и да побара објаснување за ваквите мерки спрема Единствена Македонија кои немаат основа во меѓународното право.
Определбата на Единствена Македонија за поништување на преспанскиот договор не претставува легална основа за ваквите незаконски, неевропски и антицивилизациски мерки од Грција спрема партијата Единствена Македонија.
