Бајовски: Радиоактивниот фон во РЕК Битола е во рамки на нормалата
Радиоактивниот фон измерен во РЕК Битола „не е многу поголем“ од природниот, изјави в.д. директорот на Дирекцијата за радијациона сигурност, Зоран Бајовски, по повод одбележувањето 20 години од формирањето на овој независен национален регулаторен орган.
Одговарајќи на новинарско прашање во врска со неодамнешното издигнување радиоактивен пепел од термоелектраната, Бајовски истакна дека последните мерења, направени во 2024 година од страна на технички сервиси, покажуваат дека нивото на зрачење е „во рамки блиски до природниот фон“.
„Станува збор за вредности кои се нешто повисоки од природниот фон, но сепак не излегуваат од дозволените граници. Според последните податоци, мерениот фон изнесуваше под 5.000 нанохири – но не би шпекулирал со бројки. Доколку има интерес, податоците можеме да ги доставиме и во писмена форма,“ рече Бајовски.
Тој нагласи дека природен радиоактивниот фон постои насекаде околу нас и дека сите сме изложени на јонизирачко зрачење кое, во нормални граници, не е штетно за човековото здравје. Според регулативата, сите професионално изложени лица се должни да носат лични дозиметри, кои се проверуваат месечно.
Во последните две децении, Дирекцијата има клучна улога во надзорот и лиценцирањето на активности поврзани со јонизирачко зрачење во здравството, индустријата, образованието и истражувањето. Само во 2024 година, издадени се 237 лиценци, а спроведени се 224 инспекциски контроли – од кои кај 61 правен субјект се утврдени неправилности.
Бајовски посочи дека постои сериозен недостиг на кадар – особено физичари – што ја отежнува работата на институцијата, која брои само 11 вработени. Како проблем беше посочена и честата промена на кадар во стоматолошките ординации, кои не ги доставуваат ажурирани податоци за вработените што ракуваат со радиолошка опрема.
Што се однесува до државните институции, Бајовски нагласи дека неправилности нема, но предупреди на потенцијални ризици во установите каде што се ангажирани лица по договор на дело – особено кога станува збор за работа со рендген апарати и радиоактивни извори.
