Јапонските власти се обидуваат да ја утврдат причината за несреќата на аеродромот Ханеда

Еден ден по смртоносниот судир на јапонски патнички авион и авион на крајбрежната стража на аеродромот Ханеда во Токио, властите во средата започнаа истрага за несреќата.

Јапонскиот одбор за безбедност на транспортот (JTSB), владината агенција одговорна за големи несреќи во кои учествуваат авиони, бродови и возови, почна да ги истражува јагленосаните остатоци, објави во средата јапонската новинска агенција Кјодо.

Авион на Japan Airlines се судри со авион на крајбрежната стража при слетување во вторникот, при што и двајцата се запалија.

Сите 379 патници на патничкиот Ербас А350 успеале да побегнат од запалениот авион без поголеми повреди, но пет патници од Бомбардиер ДХЦ8-300 загинале, а само капетанот бил спасен, но со тешки повреди. Пожарот на Ербасот бил изгаснат само осум часа по падот.

Помалиот авион превезувал помош за преживеаните од серијата разорни земјотреси што ја погодија Јапонија на првиот ден од годината, од кои најсилниот беше со јачина од 7,6 степени. Загинаа 62 лица.

Јапонскиот премиер Фумио Кишида во средата ја намали загриженоста дека катастрофата може да ја забави испораката на помош за погодениот запад на земјата.

Japan Airlines (JAL) соопшти дека „ќе соработува целосно со истрагата за овој немил настан“.

Ербас ќе обезбеди и техничка помош на властите во истрагата. Авионот А350-900 бил стар само две години, пренесува Хина и ДПА .

JAL откажа повеќе од 40 летови од Ханеда во средата, а All Nippon Airways исто така откажа десетици летови на аеродромот.