Антикорупциска комисија ја затвори постапката за имотниот анкетен лист на Филипче: Бил комплетен и нема докази за прикривање
Антикорупциската комисија ја затвори постапката за имотниот анкетен лист на пратеникот и претседател на СДСМ, Венко Филипче. Во објавената одлука од 3 април, комисијата соопшти дека по деталната проверка на податоците во Катастарот, Централниот регистар, МВР, УЈП и повеќе банки, утврдиле дека анкетниот лист на Филипче бил комплетен и нема докази за прикривање на информации за имот.
Постапката беше покрената минатата година, кога власта го обвини Филипче за несоодветно пријавување на имотот во анкетниот лист доставен до ДКСК и за разлики во неговата имотна состојба по завршувањето на неговиот министерски мандат. Лидерот на СДСМ беше обвинет за не пријавување на некои свои недвижности, вклучувајќи куќи, но Филипче тврди дека ги пријавил сите имоти согласно новите правила на Антикорупциската комисија, и дека разликите се резултат на повеќе катастарски имотни листови за истите недвижности.
Одлуката за затворање на постапката беше донесена на седницата на Антикорупциската комисија на 28 март.
