Ангелов: Делот со електронскиот отпад ќе го изолираме и ќе го гасиме со песок
Додека пожарникарите и помошните екипи се борат со огнот во фабриката за рециклирање отпад во скопската населба Трубарево, со нови информации за состојбата излезе и директорот на Центарот за управување со кризи, Стојанче Ангелов.
Ангелов појасни дека пожарот не зафаќа само еден вид материјал, туку се работи за комбинација. „Дел од пожарот зафаќа дрва, даски, пластика и друг горлив материјал“, изјави Ангелов.
Тој додаде дека еден од најголемите предизвици е делот каде што се наоѓа електронскиот отпад, кој бара посебен пристап за гаснење. За да се спречи ширењето на огнот и да се обезбеди ефикасно гаснење, донесена е одлука тој дел да се изолира и да се гаси со песок.
„Делот во кој се наоѓа електронскиот отпад ќе го изолираме и ќе го гасиме со песок. Во секој момент ќе пристигне голема количина песок“, истакна Ангелов.
Овие информации доаѓаат како дел од координираните напори на сите служби на терен, вклучувајќи ги пожарникарите, Центарот за управување со кризи, ТАВ Македонија и Окта, кои веќе се вклучија со специјализирана опрема. Напорите продолжуваат со цел пожарот што побрзо да се стави под целосна контрола.
