Јаневска: Учебниците што недостигаат ќе бидат поставени во ПДФ-формат на веб-страницата на Педагошката служба
Министерката за образование и наука, Весна Јаневска, изјави дека учебниците што недостигаат ќе бидат поставени во ПДФ-формат на веб-страницата на Педагошката служба. Таа прстот го впери кон директорите и комисиите во училиштата, истакнувајќи дека за недостигот не е виновно Министерството.
„Учебници има, сè што побарале училиштата е испорачано. На Министерството му е сосема сеедно дали ќе отпечати милион или милион и двесте илјади учебници затоа што имаме рамковна спогодба за печатење. Значи, тоа што е побарано е обезбедено. Не прифаќам да се каже дека учебници нема. Дали се во подобра или полоша состојба, тоа зависи од комисиите и директорите. Ова прашање треба да биде затворено и во иднина да нема вакви проблеми“, изјави Јаневска.
Според министерката, дистрибуцијата на учебниците е завршена, а остануваат само два за прва година гимназија – еден кој е спорен и друг кој сè уште е во процедура.
„Тие ќе бидат дистрибуирани кога ќе се решат овие прашања. Сите други учебници се доставени“, нагласи Јаневска.
Таа додаде дека постојат јасни правила, закон и упатства кои од следната година ќе мора да се почитуваат без исклучок.
