Андоновски предупредува: Ако студентите ги препродаваат ваучерите, следната година мерката ќе биде укината
„Злоупотребата ќе значи крај на поддршката.“ Ова е јасната порака што министерот Стефан Андоновски ја упати до студентите, во момент кога бројот на издадени ваучери за купување на ИТ опрема надмина 37.000. Иако мерката бележи огромен успех и интерес, појавата на огласи за препродажба на уредите на социјалните мрежи го вклучи алармот во Владата.
Во интервју за „Бизнис Плус“ на МРТ2, Андоновски даде детален пресек на состојбата со дигитализацијата, од студентскиот стандард до електронските услуги за граѓаните.
Статистиката покажува дека интересот за мерката е огромен. Од вкупниот број на студенти во државата (околу 55.000), мнозинството веќе ја искористиле можноста.
„Ова покажува дека голем дел од нив, односно мнозинството на заинтересираните за кои ова било приоритет, веќе го завршиле процесот. Ова јасно го покажува успехот на мерката,“ истакна Андоновски.
Сепак, сенка врз успехот фрлаат информациите дека дел од купената опрема веднаш завршува на црниот пазар. Министерот беше дециден дека ваквото однесување може да има долгорочни последици.
Тој појасни дека доколку се утврди масовна препродажба, ќе се смета дека младите немаат реална потреба од оваа помош.
Втората клучна тема беше модернизацијата на администрацијата. Андоновски ја истакна предноста на новите електронски услуги кои го штедат времето и парите на граѓаните.
„Лице што живее во Скопје, но доаѓа од друг град, за помалку од 10 минути може да ја добие својата потврда од дома, било тоа во 20:00 часот во недела или во 7:00 часот наутро. Без разлика на времето, тој ја добива потребната потврда,“ објасни министерот.
Министерот потсети дека дигиталните документи се законски валидни и секоја институција што ги одбива прави прекршок.
„Без разлика дали го печатите или го користите електронски, документот е важечки. Кој не го прифаќа, постапува спротивно на законот,“ дециден е Андоновски.
На крајот, Андоновски упати апел за поголема внимателност во онлајн просторот. Тој нагласи дека додека владините портали се безбедни, корисниците често грешат со поставување на слаби лозинки на други платформи.
„Треба да се внимава на личните податоци и со кого ги споделуваме. Ние сме внимателни некој член на семејството да не ја знае нашата лозинка, но многу лесно поставуваме лозинки на различни профили,“ заклучи тој, уверувајќи дека државните системи нудат целосна сигурност и поддршка во случај на компромитирање на налогот.
