Андоновски: Името на кандидатот за Град Скопје на ВМРО-ДПМНЕ очекувам да дојде во текот на летото
Министерот за дигитална трансформација Стефан Андоновски, денеска изјави дека во текот на летото ќе се знае кој ќе биде кандидат на ВМРО-ДПМНЕ за градоначалник на Град Скопје.
Тој потсети дека во моментот траат внатрепартиските анкети, каде се оценуваат повеќе потенцијални имиња, а според него, тој што ќе најдобар на истите ќе биде иден прв човек на Скопје.
-Името за Град Скопје очекувам да дојде во текот на летото, иако постојат и јавно се познати дел од имињата кои што доаѓаат од ВМРО-ДПМНЕ, има и други заинтересирани, така што се анкетираат во моментов и очекувам дека во средината на летото ќе имаме резултати. Секако дека имам и мои лични фаворити и фаворити на партијата, но ќе оставам органите и телата на партијата тоа да го соопштат. Очекувам дека анкетите ќе покажат дека некој кој што е партиски член или активист ќе биде најдобар на анкетите и наш прв избор, изјави Андоновски на Факултетот за информатички науки и компјутерско инженерство (ФИНКИ) каде што денеска започна хакатонот „Кликни безбедно“.
Андоновски истакна дека во партијата се задоволни од мерењата на јавно мислење и очекуваат уште поголема победа во однос на минатите избори.
-Процесот е во тек, започна уште во почетокот на годината за сондирање на состојбите кои што се во општеството, колку граѓаните се задоволни од сегашните градоначалници, колку сметаат дека можеби некој треба да има промена и кое име сметаат дека најдобро би ја вршел задачата. Првиот бран на одлуки ќе биде во втората половина на мај за определени општини каде што веќе тоа е кристално јасно, голем дел од постоечките градоначалници ќе трчаат и втор пат, изјави Андоновски.
