Јанчев се обиде да се пресмета на терен со судијата, а потоа преку Фејсбук порача: Ова за нас е победа против ФФМ и корумпираните судии

Со инцидент се одигра првото полувреме меѓу екипите на Тиквеш и Гостивар попладнево во Кавадарци.

Имено, во главна улога беше градоначалникот на Кавадарци, Митко Јанчев кој влета на теренот за да се пресмета со судијата, а се почна со досудениот пенал во корист на Гостивар во 31. минута кога еден домашен играч се обиде да ја расчисти опасноста од својот шеснаесетник.

Јанчев потоа се огласи на својот Фејсбук профил каде порача дека тоа за нив е победа против ФФМ.

„После целиот “циркус” на фудбалскиот терен, сепак Господ е на страната на правдата. Иако имаше 2 исклучени играчи, ГФК Тиквеш 1930 го израмни резулатот на 2-2. Со ваквото однесување на ФФМ, кое е срамно и жално за македонскиот фудбал, се оди само во стечај. Иако резулатот е нерешен, ова за нас е победа против ФФМ и корумпираните судии. Напред момци!“, објави Јанчев на Фејсбук.