Америка одби да и продаде Ф-16 на Турција додека на Шведска и Финска не им се дозволи влез во НАТО
Американскиот Конгрес не може да поддржи продажба на борбени авиони Ф-16 на Турција во вредност од 20 милијарди долари додека официјална Анкара не го ратификува членството на Шведска и Финска во НАТО, соопштија денеска група сенатори од двете партии.
Шведска и Финска аплицираа за приклучување кон трансатлантскиот одбранбен сојуз минатата година откако Русија ја нападна Украина, но се соочија со неочекувани приговори од Турција и оттогаш се обидуваат да ја добијат нејзината поддршка.
Анкара сака Хелсинки и Стокхолм да заземат построг став кон Курдистанската работничка партија (ПКК), која Турција и Европската унија ја сметаат за терористичка група, и друга група која ја обвинува за обидот за државен удар во 2016 година.
Трите нации постигнаа договор во Мадрид минатиот јуни, но Анкара ги прекина разговорите минатиот месец по протестите во Стокхолм за време на кои екстремно десничарски дански политичар запали копија од Куранот.
Во писмото до американскиот претседател Џо Бајден, 29 демократски и републикански сенатори рекоа дека двете нордиски земји прават „целосни и добри напори“ да ги исполнат барањата за членство во НАТО што ги бара Турција, иако Анкара вели дека Шведска мора да стори повеќе.
„Откако Турција ќе ги ратификува протоколите за пристап во НАТО, Конгресот може да ја разгледа продажбата на борбени авиони Ф-16. Меѓутоа, ако не го стори тоа, ќе ја загрози оваа претстојна продажба“, напишаа сенаторите.
Тоа е првпат Конгресот експлицитно и директно да ја поврзе продажбата на Ф-16 на Турција со барањата на двете нордиски земји да влезат во НАТО.
Администрацијата на Бајден веќе во неколку наврати изјави дека ја поддржува продажбата и одби да ги поврзе двете прашања, иако призна дека ратификацијата на приемот на Шведска и Финска во НАТО ќе го олесни процесот на одобрување на продажбата во Конгресот.
Турција најави дека може да го одобри влезот на Финска во НАТО, но финскиот претседател и министерот за надворешни работи ја отфрлија идејата, тврдејќи дека безбедноста на двете нордиски земји е заемно зависна. Од 30-те членки на НАТО, само Турција и Унгарија треба да го ратификуваат членството на овие нордиски земји.
Во октомври 2021 година, Турција побара купување на 40 ловци Ф-16 од корпорацијата Локхид Мартин и речиси 80 комплети за модернизирање на постојните воени авиони.
За време на посетата на Вашингтон минатиот месец, турскиот министер за надворешни работи Мевлут Чавушоглу рече дека прашањето на НАТО не треба да биде услов за таа продажба и ја повика администрацијата на Бајден да го убеди Конгресот да се откаже од својот приговор.
