АЛБАНИЈА ГРАБИ НАПРЕД: Oтвора уште еден кластер во преговорите за пристапување во ЕУ
Албанија отвора уште еден кластер во преговорите за пристапување во Европската Унија(ЕУ).
На Меѓувладината конференција за пристапување во Брисел, Албанија денеска ги отвори преговорите во Група 3, Конкурентност и инклузивен раст, која вклучува осум преговарачки поглавја.
Ова е веќе четвртиот кластер што таа го отворила во преговорите досега. Нова методологија за преговори беше воведена во 2020 година, кога 35-те преговарачки поглавја беа поделени во шест тематски кластери. Оттогаш, земјите-кандидатки не отворија преговори за поединечни поглавја, туку за неколку од нив, обединети во групи. Според најавите на европските лидери, Aлбанија има реални шанси во 2027 година да влезе во ЕУ.
Албанија аплицираше за членство во ЕУ на 24 април 2009 година, по што Европската комисија на 9 ноември 2010 година оцени дека пред официјален старт на пристапните преговорите, земјата треба да постигне поголем степен на усогласеност со критериумите за членство, вклучително и со имплементација на 12-клучни приоритети.
Во октомври 2012 година, Европската комисија препорача на Албанија да се додели статус на кандидат за членство, под услов да ги спроведе клучните барања за реформа на судството и јавната администрација и за промена на Деловникот на албанското Собрание.
Албанија доби статус на земја кандидат за членство во ЕУ во јуни 2014 година, но стартот на преговорите две години беше блокиран од страна на Грција поради, според тврдењето на Атина, кршење на правата на припадници на грчкото малцинство во земјата.
foto freepik.com
