АКЦИИТЕ ОД МАРКЕТИТЕ ЗАВРШИЈА НА УЛИЦА: Ливчиња со попусти наместо на рафтовите, расфрлени на улица
Откако Владата на неодамнешната седница, донесе одлука со која им се забранува на трговците кои вршат трговија на мало да нудат акциска продажба (акција) и промотивна продажба (промоција) при нивно ставање во промет, околу некои од големите маркети можат да се забележат расфрлени листови на кои се наведени промотивни акциски цени или попусти.
Одлуката, објаснија од Владата, е донесена со цел да се спречи злоупотреба во прометот на одделни производи и стоки. Одлуката ќе се применува до 30 ноември 2023 година.
„Со оваа одлука ќе се намалат можни манипулации при ваквиот вид на продажба на земјоделски и прехранбени производи, исто така ќе се намали и ќе се спречи нарушување на домашниот пазар заради злоупотреба во прометот на одделни производи и стоки. Одлуката е со цел граѓаните да ја знаат точната и реална цена на производот, и да не се доведуваат во заблуда со цените на прехранбените производи“, соопштија од владината прес-служба.
Бектеши пред медиумите рече дека ќе може да се продаваат производи на акција единствено ако нивниот рок на употреба е пред истекување, но и дека тоа содржински ќе треба специјално да биде истакнато на продуктите.
