30 дневен притвор за Александар Нацев!
Основниот суд во Кочани му одреди мерка притвор во траење од 30 дена на Александар Нацев, сопственик на агенцијата за обезбедување „Рубикон“, по проширувањето на истрагата од страна на Основното јавно обвинителство – Кочани.
Нацев е осомничен за тешки дела против општата сигурност, поврзани со трагичниот пожар што се случи во дискотеката „Пулс“, каде загинаа 62 млади лица. Обвинителството утврдува дека тој раководел со целокупното работење на агенцијата, заедно со веќе осомничениот управител и со овластеното лице на подружницата во Кочани.
Иако дискотеката била физички обезбедувана, според Обвинителството, агенцијата „Рубикон“ немала склучен официјален договор за обезбедување на објектот – што е клучен момент во истрагата, со оглед на обврските и одговорностите кои произлегуваат од Законот за приватно обезбедување.
Александар Нацев е универзитетски професор, а пред десетина години беше и директор на Дирекцијата за безбедност на класифицирани информации.
