11-годишното дете кое падна од училишна зграда во Прилеп е во стабилна состојба

11-годишниот ученик од шесто одделение во Прилеп се наоѓа на лекување на Клиниката за детски болести во Скопје, откако вчера попладне, за време на големиот одмор, паднал од највисокиот кат на училиштето „Гоце Делчев“. Од училиштето го опишуваат ученикот како дисциплиниран, трудољубив, дружељубив и примерен, со одличен успех и поведение.

Настанот се случил околу 14:35 часот, при што ученикот се здобил со тешки повреди, вклучително скршеници. По несреќата, веднаш била повикана Итната медицинска помош, која го транспортирала до прилепската болница „Борка Талески“. По првичните испитувања, ученикот бил префрлен на Клиниката за детска хирургија во Скопје.

Директорката на училиштето, Снежана Котева, информира дека веднаш по инцидентот, вработените реагирале брзо и навремено. „Ученикот беше контактибилен, свесен за времето и просторот. По одредени испитувања во прилепската болница, беше препорачан транспорт во Скопје. Според последните информации од дежурниот лекар, ученикот е во стабилна здравствена состојба, надвор од животна опасност, и покрај повредите,“ стои во соопштението од училиштето.

Котева истакна дека училиштето ги почитува сите безбедносни протоколи и дека дежурните наставници совесно ја извршуваат својата должност. „Вработените го почитуваат кодексот на однесување и одговорно ги исполнуваат обврските,“ се додава во соопштението.

Настанот предизвика загриженост кај јавноста, но од училиштето уверуваат дека се преземени сите потребни мерки за поддршка на ученикот и неговото семејство.