ЗНМ: Пресудата против ИРЛ е срамна, судијката оценила дека новинарите на ИРЛ всушност не се новинари и можат да се соочат со забрана за работа
Здружението на новинарите на Македонија (ЗНМ) денеска остро реагира на објавеното писмено образложение на пресудата на судијката Јованка Спировска Панева, која одлучуваше во случајот „Фероинвест против ИРЛ“.
Според ЗНМ, пресудата за сторијата „Заговор против воздухот“ беше објавена на 24 октомври, а денеска стасало писменото образложение во кое се користат низа проблематични квалификации кои се граничат со цензура и закани за затворање на медиумот.
Освен ова, како што пишува ЗНМ, за колешката Цветковска, која е глобално наградуван новинар во дејноста за истражувачко новинарство, судијата Панева вели дека „таа во здружението (се мисли на ИРЛ), нема својство на новинар, па не може да се претставува во емисиите, кои таму се снимаат, ниту како уредник ниту како новинар бидејќи таквите емисии не се сметаат како новинарски продукт“.
Ова, според ЗНМ, може да се толкува како повик на Панева до извршната власт за институционална пресметка со критичните медиуми.
ЗНМ за оваа судска постапка ќе иницира пријава до Платформата на Советот на Европа за промовирање на заштитата на новинарството и безбедноста на новинарите. Платформата известува за сериозни закани за безбедноста на новинарите и слободата на медиумите во Европа, а со цел да се зајакне одговорот на Советот на Европа на заканите и одговорноста на земјите членки.
Од ЗНМ велат дека за сторијата „Заговор против воздухот“, која исто така беше емитувана и на МРТВ, ИРЛ доби две новинарски награди, а Советот на честа и Советот за етика, по претходни претставки, донесе одлуки дека овој медиумски производ е во согласност со Етичкиот кодекс на новинарите.
Потсетуваат дека на 19. октомври поднеле претставка до Судскиот совет за судијката Спировска Панева за неправедно исклучување на јавност од рочиште за оваа судска постапка. Во претставката се бара одговорност од судијката за постапката, а од Судскиот совет на РСМ да поведе постапка за утврдување дисциплинска одговорност согласно доставените докази и посочените законски одредби против судијката Јованка Спировска Панева.
