ЖЕНА ОД РЕПУБЛИКА СРПСКА 17 ГОДИНИ БИЛА ВО ЗАРОБЕНИШТВО: Ja нашле со повреди и со коса долга до подот

Полициската управа во Бања Лука го истражува случајот со запуштање на жена од околината на Лакташ, на возраст од околу 40 години, која во многу лоша психофизичка состојба е примена во Универзитетскиот клинички центар на Република Српска (УКЦРС), откако со години наводно била во заробеништво. Членовите на нејзиното семејство ја држеле затворена.

Како што пренесува АТВ, жената е примена во УКЦ на 12 септември годинава откако семејството повикало итната помош, затоа што практично била на умирање. Лекарите ја пронашле неухранета, онесвестена, со рани по целото тело.

„Лекарите рекоа дека вакво нешто не виделе во животот… Неизмиена со години, жената имаше коса до подот. Беше целосно запуштена, а случајот е пријавен во полициската станица во Лакташ. Полицијата постапила по пријавата, а лекарите констатирале дека има повеќе повреди по телото од лежење. Станува збор за декубитални повреди до коската. Не можеа да потврдат други повреди“,  изјави извор близок до истрагата, пишува АТВ.

Еден од браќата во полиција изјавил дека неговата сестра не излегувала од дома од 2006 година. Тој рекол и дека за тоа време семејството не се обратило никому за помош. Ниту на лекарите, ниту на надлежниот Центар за социјална работа, ниту на ниту една институција. Жената нема лични документи, наводно завршила само основно училиште и живеела во домаќинство со нејзината мајка и двајцата браќа.