Заврши времето кога криминалците шетаа слободно, сега мајките спокојно се враќаат дома во доцните часови, кажа Мицкоски на Денот на полицијата
На одбележувањето на Денот на македонската полиција – 7 Мај, во Центарот за обука на Министерството за внатрешни работи во Идризово, премиерот Христијан Мицкоски вели дека „времето кога криминалци слободно се движеле, а институциите биле користени за лични и политички интереси, е завршено“.
„Се сеќаваме – и не смееме да заборавиме – како изгледаше нашето секојдневие пред неколку години. Криминалците се шетаа слободно, државата молчеше, а граѓаните живееја со чувство на немоќ. Имаше време кога институциите се користеа како алатка за лични и политички интереси, а не за правда. Пораките ‘ќе средиме’ и ‘ќе се јавам’ беа погласни од законот. Но, тоа време е завршено.Во оваа држава нема веќе место за врски, непотизам и заштита од одговорност. Законот важи за сите – без разлика дали се работи за обичен граѓанин, функционер или бизнисмен“, рече Мицкоски.
Мицкоски додаде дека силата на државата се мери со тоа дали правдата стигнува до сите, вклучително и до најмоќните и најмаргинализираните.
„Вашата мисија е света – да го чувате поредокот, но и да ја вратите довербата кај народот“, им се обрати премиерот на полициските службеници.
Обраќајќи се до граѓаните, Мицкоски кажа дека безбедноста не е само статистичка бројка, туку чувство кое го овозможуваат токму полицајците – чувство кога родителите без страв ги пуштаат децата на училиште, кога мајките спокојно се враќаат дома во доцните часови и кога секој граѓанин знае дека државата стои зад него.
