Законот за соодветна и правична застапеност во октомври пред Венецијанската комисија
Претседателот на Владата, Христијан Мицкоски, вчера испратил писмо со кое побарал итно мислење од Венецијанската комисија на Советот на Европа за нацрт-законот за соодветна и правична застапеност на Република Северна Македонија.
Според најавите, мислењето ќе биде доставено за усвојување на 144-та пленарна седница на Венецијанската комисија, која ќе се одржи на 9 и 10 октомври 2025 година во Венеција, дознава 4NEWS.mk
Со ова барање, Владата сака да обезбеди експертска проценка од европските правни советници за клучното законско решение, кое се однесува на унапредување на принципот на правична застапеност на сите заедници во државата.
Според Мицкоски, предлог-законот има јасна цел, администрацијата да биде вистински сервис за сите граѓани, изградена врз заслуги, знаење, професионалност и интегритет, согласно Уставот и Охридскиот рамковен договор.
Тој вели дека со законот се отвора ново поглавје на професионализам во јавниот сектор, како на државно така и на локално ниво. Како што појасни Мицкоски, предлог-законот ќе биде доставен до Венецијанската комисија, а потоа ќе влезе во собраниска процедура.
Законот, рече Мицкоски, е гаранција дека етничките заедници ќе бидат соодветно и правично застапени,но истовремено во таков процес тој ќе ги штити квалитетите на сите етнички заедници.
На прес-конференцијата со Мицкоски беше и првиот заменик-претседател на Владата, Изет Меџити, кој рече дека овој предлог-закон претставува историски момент.
„Овој предлог-закон претставува историски момент бидејќи за прв пат правичната и соодветна застапеност како уставна категорија од 2001 година добива јасна цел односно законско решение. Предлог-законот гарантира еднаква пристапност во вработување и унапредување во јавната администрација, правична и соодветна застапеност на сите заедници во јавните институции, но и обезбедување вработувањето и унапредувањето да се вршат врз основа на заслуги и квалификации на секој поединец“, рече Меџити.
Регулативата произлезе откако Уставниот суд го укина Балансеротшто беше алатката за вработување според етничката припадност во државните институции.
Од ДУИ со остра реакција за предложениот закон велат ова е обид уставната обврска да се претвори во административна фарса
