„Загадувањето е само визуелно – умирањето е реалност“: Граѓаните повторно на протест!
Жителите на скопските населби Аеродром и Ново Лисиче денеска повторно излегоа на протест пред паркот „Авионче“, во знак на бунт против загадениот воздух кој, како што велат, ги труе секојдневно. Протестот, насочен првенствено кон дивата депонија Вардариште, но и кон други загадувачи како Дрисла, денеска доби уште посилен визуелен и мирисен ефект.
Во позадината на насобраните граѓани се извиваше густ чад од пожарот во фабриката „Ф – ГРУПАЦИЈА“ во Трубарево – иронична и болна слика за ситуацијата со која се соочуваат. Покрај визуелниот ефект, чадот влијаеше и на дишните органи на присутните.
Протестантите носеа транспаренти со пораки како „Премиерот дише ист воздух или има друг?“, „Меѓу две депонии умира еден град“ и „Загадувањето е само визуелно – умирањето е реалност“. Еден од граѓаните коментираше: „Среќа што на камера не се осеќа како смрди“.
Еден од учесниците на протестот изрази разочарување од малата бројка на присутни. „Зарем не им пречи ова што го дишат? По еден човек од стан да излезеше, ќе направевме поголем притисок“, рече тој, укажувајќи на апатијата кај дел од жителите.
Протестите на граѓаните продолжуваат со барање за итно решавање на проблемот со загадувањето, кое денеска уште еднаш се покажа како сериозен ризик по здравјето и животот на скопјани.
ФОТО: Цивил.мк
