ВУЧИЌ: Не ни паѓа на памет да воведеме вонредна состојба
Во Белград утре ќе има голем студентски протест, а претседателот Александар Вучиќ изјави дека не планира воведување вонредна состојба доколку не се случи голем напад врз безбедносните сили.
„Веруваме дека успеавме да го спречиме тоа. Не ни паѓа на памет да воведеме вонредна состојба“, рече Вучиќ.
Тој изјави дека собирот ќе биде обезбеден иако не бил пријавен до надлежните државни органи. Ги повика сите да не предизвикуваат немири, а полицијата да не употребува сила без апсолутна потреба, туку само во „јасни ситуации на прекршување на законите и загрозување на животот“.
Студентите кои повеќе од три месеци ги блокираат факултетите низ Србија повикаа на протест во Белград на 15 март. Нивното главно барање е кривична и политичка одговорност за смртта на 15 луѓе при уривање на бетонска настрешница на Железничката станица во Нови Сад на 1 ноември во 2024 година. Меѓу загинатите беше и македонскиот државјанин Васко Саздовски. Вучиќ изјави дека направил голема грешка што одлучил да помилува 12 лица, исполнувајќи го третото барање на студентите во блокадата, а како причина за жалење го наведе апсењето на опозиционер и активист во Нови Сад на 14 март.
foto reuters
