ВУЧИЌ ДО БУГАРИТЕ: Ни замеруваат што ние сме многу попопуларни од нив во Македонија
Српскиот претседател Александар Вучиќ ги пофали односите со Македонија.
Претседателот Вучиќ вели дека Бугарите им замеруваат што тие се многу попопуларни од нив во Македонија.
Тој изјави дека ги подобриле односите со сите соседи освен со Хрватска и дека историски Србија има најдобри односи со Македонија.
„Бугарите ни замеруваат што ние сме многу попопуларни од нив во Македонија. Што да правам јас. Со Хрватска ќе имаме подобри односи во иднина кога ќе сфатат дека Јасеновац е срамота, а нешто што треба да се заборави. Со Албанија имаме добри, пристојни односи со оглед на прашањето за Косово и Метохија кое тие го викаат само Косово“, рече Вучиќ во синоќешната емисија „Хит твит“.
Кажа дека многу му се допаѓаат македонските вина, но дека не сака да издвои кое вино му е омилено.
Истражувањето на Центарот за европски стратегии „Евротинк“ објавено годинава покажа дека македонските граѓани за најголем пријател ја сметаат Србија. Од друга страна, за најголема закана ја сметаат Бугарија. На повеќе анкети, мнозинството граѓани изјавувале дека Србија е најголем пријател на Македонија.
