Врховен ја укина пресудата против Васил Јованов за поседување и трговија со наркотици – предметот вратен на повторно постапување
Врховниот суд ја укинал пресудата на Апелациониот суд Скопје против Васил Јованов со која беше осуден на три години и 10 месеци затвор за кривичното дело поседување и трговија со наркотици.
Предметот е вратен на второстепениот суд на повторно постапување и одлучување.
Одлуката била донесена на седница одржана на 7 мај 2025 година, една недела пред Кривичниот суд Скопје да ја изрече затворската казна од 12 години за Јованов, врз основа на признание на вина за тешката сообраќајна несреќа на булевар „Партизански одреди“ во Скопје, во која животот го загуби 22-годишната Фросина Кулакова.
„Советот за казниви дела при Врховниот суд на Република Северна Македонија, на седницата одржана на ден 07.05.2025 година, донесе пресуда КВП2-43/25, со која го уважи барањето на осудениот В.Ј. од Скопје, за вонредно преиспитување на правосилната пресуда поднесено преку бранителот Панче Нефтенов, адвокат од Скопје, ја укина пресудата на Апелациониот суд Скопје КЖ-1047/24 од 05.02.2025 година и предметот го врати на второстепениот суд на повторно постапување и одлучување“, објави Врховниот суд.
