„Време е за одговорност“: ВМРО-ДПМНЕ ќе ја поддржи интерпелацијата за Љупчо Коцевски
Пратеничката група на ВМРО-ДПМНЕ денеска најави дека ќе ја поддржи интерпелацијата за работата на Републичкиот јавен обвинител Љупчо Коцевски, поднесена од страна на опозициската партија Левица. На прес-конференција, координаторот на групата, Никола Мицевски, истакна дека институциите предолго молчеле пред корупциските скандали, а јавниот обвинител не покажал храброст и интегритет за да се соочи со нив.
„Институциите, во соработка со обвинителството, со години молчеа пред огромните скандали, голем дел предизвикани од врвот на СДС и ДУИ. Јавното обвинителство остана рамнодушно и пасивно пред тие извори на неправда. Дадената шанса за Љупчо Коцевски е веќе потрошена. Наместо реформа и интегритет – добивме молк и сервилност кон власта. Затоа, ВМРО-ДПМНЕ ќе ја поддржи интерпелацијата, во интерес на принципите, граѓаните и правдата,“ порача Мицевски.
Тој потенцираше дека, и покрај политичките разлики со Левица, нивната борба против корупцијата останува недвосмислена и приоритетна.
„Без оглед на суштинските разлики со Левица, нашата заложба за бескомпромисна борба против корупцијата и организираниот криминал останува цврста. Обвинителскиот систем мора да биде независен, функционален и храбар – да не трепери пред политички притисоци и да не биде соучесник во криминалот,“ додаде тој.
Запрашан што доколку интерпелацијата биде изгласана, а Коцевски не поднесе оставка, Мицевски одговори дека тогаш ќе имаат дополнителен став, во согласност со законските процедури.
Во врска со прашањето дали до локалните избори ќе се изберат нови челници на Јавното обвинителство, Народниот правобранител и Државната комисија за спречување на корупција, тој изјави дека институциите не зависат од еден човек и оти постојат заменици кои можат да ја вршат функцијата.
„Ако во државата се потпираме само на еден човек, не ни е добра работата. Да ги оставиме процедурите да течат и да не предвидуваме однапред,“ рече Мицевски.
Интерпелацијата за Коцевски доаѓа во време на зголемен јавен притисок за реформирање на правосудните институции и порачува дека одговорноста не смее да биде само декларативна – туку мора да се спроведе и на дело.
