Вредноста на руската рубља и натаму тоне
Продолжува да паѓа вредноста на руската валута рубљата.
Таа денеска падна на најниско ниво во однос на еврото од март 2022 година. Податоците од Московската берза покажуваат дека за прв пат од 25 март минатата година, еврото во еден момент вредеше повеќе од 107 рубљи, пренесува „Комерсант“.
Во 9 часот и 38 минути вредноста на еврото се зголеми за 0,37 отсто на 106,8 рубљи, како и доларот кој скокна за 0,14 отсто на 97,2 рубљи, а вредноста на кинескиот јуан се зголеми за 0,34 отсто на 13,4 рубљи. Пред два дена американскиот долар се искачи над 97 рубљи за прв пат од март лани.
Главниот аналитичар на Промсвјазбанката, Денис Попов, изјави дека падот на надворешно-трговскиот суфицит на Русија – стабилен пад на извозот, со високиот увоз – е основниот фактор за слабеење на руската валута. Откако Русија ја почна војната во Украина лани на 24 февруари, руската валута никако да се стабилизира.
foto freepik.com/photomars
