ВРАБОТЕНИ ВО ФАБРИКАТА ЗА ЛЕКОВИ „ГАЛЕНИКА“ ВО СРБИЈА ШТРАЈКУВААТ – бараат зголемување на платите

Околу 250 работници на фабриката за лекови „Галеника“ во Земун, Србија организирани од синдикатот „Независност“ во таа компанија, втор ден штрајкуваат со барање нивниот сопственик, бразилската компанија ЕМС да им ги зголеми платите.

Како што пренесуваат медиумите од соседството, претседателот на Синдикатот „Независност Галеника“, Зоран Пантелиќ, кој е и претседател на Штрајкувачкиот одбор, барањето на работниците што протестираат е да се зголемат платите за 10 проценти во однос на просечната плата во фабриката.

– Колективниот договор предвидува платите да се усогласуваат еднаш годишно, и соодветно на тоа бараме веднаш и во еден дел да се зголемат во бараниот износ. Засега никој од раководството не контактирал. Подготвени сме за разговори со раководството, за нашите барања, во секое време и штом се зголеми платата во висина што ја бараме, штрајкот ќе биде прекинат и фабричките машини ќе бидат ставени во функција – нагласи соговорникот.

Тој додаде дека преговорите со менаџментот почнале лани во ноември, за да може договорот за зголемување на платите да почне да се применува од февруари годинава.

– Работодавачот понуди зголемување на платата во два дела и во помал процент од тој што го баравме. Самостојниот синдикат во фабриката се согласи на понудата. Ние од „Независности“ ги анкетиравме работниците и тие изјавија дека сега поскапувањето мора да биде од еден дел. Затоа штрајкувавме за да го постигнеме тоа – вели Пантелиќ и наведува дека штрајкот ќе трае се додека не се исполни барањето за зголемување на личниот доход во бараниот процент.

Инаку, заработката во Галеника е под просекот во таа стопанска гранка. Пантелиќ посочува дека барањето за зголемување на платите е оправдано затоа што ланската инфлација била 12 отсто и дека е потребно висината на платите да биде таква за да им се обезбеди пристоен живот на вработените.

Штрајкот почна вчераутро во прва смена, а целосно беше стопирано производството во најголемиот објект за производство на лекови во фабриката.

Фото: Принтскрин/Фејсбук