Во сабота 15-ти „Марш на ангелите“ во Кочани
Четири месеци по најголемата трагедија во поновата историја на Република Северна Македонија, семејствата на трагично загинатите деца од пожарот во дискотеката „Пулс“ најавуваат одржување на петнаесетиот „Марш на ангелите“ – симболичен чин на болка, достоинство и континуирана борба за правда.
Маршот ќе се одржи во сабота, на 19 јули, со почеток во 18:05 часот – време што, како што посочуваат организаторите, „симболично ја претставува доцната и, за жал, фатална институционална реакција“.
„Ве повикуваме со отворено срце да ни се придружите – да маршираме заедно во тишина, тишина која симболизира гласно потсетување дека ваква трагедија никогаш повеќе не смее да се повтори – ниту за едно дете, ниту за една мајка“, велат во соопштението родителите на жртвите.
Настанот ќе се одвива во знак на тивка почит, но и како апел до институциите – да се изведат пред лицето на правдата сите одговорни, и да се преземат конкретни чекори за да се спречат идни трагедии од ваков размер.
