Влегле со багер и почнале на диво да градат паркинг во поликлиниката „Бит Пазар“ во Скопје, уапсени 2 лица

Две лица вчера попладне со багер ја урнале оградата на поликлиниката „Бит Пазар“ во Скопје и во дворот почнале со градежни работи за изградба на паркинг, јавува СДК.МК.

Од порталот велат дека со багерот врз тревата било почнато со нанесување на тампон подлога.

Директорот на Здравствениот дом Скопје д-р Виктор Исјановски, за упадот во установата вели дека истиот се случил околу 19 часот, по што чуварот веднаш го известил одговорното лице од техничката служба на поликлиниката и двајцата директори.

„Веднаш штом бев информиран за случајот, пријавив во Министерството за внатрешни работи и лично кај министерот Оливер Спасовски. Веднаш беше интервенирано и според моите информации, уапсени се две лица. Не знам што имале намера да градат, но вакво нешто е незамисливо, некој на диво да влезе во јавна установа и да почне да гради“, вели Исјановски за порталот.

Од МВР пак информираат дека дека вчера на подрајчето Бит Пазар од полициски службеници се приведени Н. К. (44) и Ш. Д. (42), поради сомнение дека сториле кривични дела „Узурпација“ и „Бесправно градење“.