Владата повторно ќе набавува нови возила на лизинг
Владата преку Службата за општи и заеднички работи продолжува со нов циклус набавка на возила под лизинг, но нема да продолжи со досегашните, туку се бара тие да бидат нови.
Се бара целосно нови 45 дизел возила (лимузини) од минимум 2.000 метри кубни моторна зафатнина. Отворањето на понудите ќе биде по електронски пат на 27 март. Понудата нема да биде прифатлива доколку има „невообичаено ниска цена“.
По истекот на тригодишниот договор, операторот ќе си ги врати за себе автомобилите, но во текот на тригодишниот договор ќе биде должен да обезбедува сервис, осигурување, регистрација, промена на пневматици, зелен картон, пренос на дефектно возило за репрезентативните автомобили.
Во претходниот тригодишен циклус, Владата набави 45 луксузни возила „шкода суперб“ со погон на четири тркала во вредност од 1,5 милиони евра без ДДВ. Месечниот лизинг за едно возило, според договорот, изнесуваше 60 илјади денари со вклучен ДДВ, а вкупната цена на едно возило достигнуваше околу 40 илјади евра. Пред тоа премиерот, министрите и странските делегации се возеа во „фолксваген пасат“.
И овој пат е предвидена километража од 120.000 километри за тригодишниот период по возило. Владата, односно Службата за општи и заеднички работи ќе има обврска кон лизинг компанијата по завршувањето на оперативниот лизинг да плаќа по поминат километар за секое возило.
Иако трошокот на крај излегува не многу помал отколку да се купи возилото, од Владaта претходно оценија дека оперативниот лизинг бил најповолното решение и дека така ќе се заштедело. Операторот постојано ќе обезбедувал грижа и сервис и функционерите немало да останат без возило доколку кај некое настане дефект.
А.К.
