Владата ги враќа цените во маркетите од 1 август
Премиерот Димитар Ковачевски денес како одговор на новинарско прашање рече дека најверојатно цените од 1 август ќе се земат како референтни за најавеното поевтинување на повеќе од 50 основни прехранбени производи во земјава.
Министерот за економија Крешник Бектеши вчера објави дека од среда ќе има намалување на 50-тина прехранбени производи со одлука на владина седница еден ден претходно, но не кажа кој датум ќе се земе како репер за старите цени што треба да се вратат.
Набрзо треба да следуваат и законски измени со кои маркетите ќе може привремено да се затвораат од инспекторите доколку не ги почитуваат старите ценовници. Ковачевски рече дека новиот бран поскапување се случувал по 1 август
-Ги анализиравме цените и практично, покачувањето се случува најмногу после 1 август, затоа го земавме како репер. Но, тоа не значи дека нема да се земат предвид и другите елементи, па и јули. Анализата се прави, сметам дека до крајот на викендов ќе биде завршена. Најважно е дека се носи мерка со која ќе бидат прекинати секакви можности за манипулација со промоции на цените и тоа што се одржа состанок на кој трговските ланци изразија волја за намалување на цената за најмалку 10 отсто, како и дека нема да биде земена како рефрентна цената денес, туку цената што се наоѓа во период зад нас, рече премиерот денеска претпладне.
