ВИДЕО Претепана малолетничка, но правдата е блокирана: Обвинителството во Штип молчи, таткото не се откажува!
Шокантен случај на насилство меѓу малолетници во Штип отвори сериозни прашања за постапувањето на институциите. Според информациите објавени од Порталикс, таткото на претепаното девојче тврди дека обвинителката Татјана Кацарова го разубедувала да не го продолжи случајот.
На видеото, кое кружи на социјалните мрежи, се гледа како малолетнички брутално напаѓаат своја врсничка.
И покрај тоа, обвинителката наводно му рекла на таткото дека „немало доволно докази“ бидејќи снимката била направена со мобилен телефон на друго дете.
Дополнително, според таткото, му било кажано дека лекарската документација за повредите на неговата ќерка била „стара“, иако тој вели дека е извадена само неколку дена по инцидентот.
„Ми рече да не се надевам на некаков резултат. Но јас ќе одам до крај. Мора да има правда за моето дете,“ изјави таткото.
Наместо институционална поддршка, семејството тврди дека добива обесхрабрување.
Адвокатката Маја Ристова вели дека и родителите на насилниците треба да понесат одговорност.
Од Обвинителството во Штип засега нема официјален одговор.
