(ВИДЕО) ПОЛИЦИЈАТА УАПСИ ГРЧКИ ПРАТЕНИК: Кршел експонати на изложба затоа што сметал дека тоа е богохулење

Пратеникот Николаос Пападопулос од грчката радикално десничарска партија Победа е уапсен претпладнево откако упаднал во Националната галерија и нанел штета на витрини и експонати од изложбата што според него е богохулење, јави дописничката на МИА од Атина.

Влегол во галеријата, скршил заштитни стакла и експонати за кои, според грчките медиуми извикувал дека „ја навредуваат религијата“, по што интервенирала полицијата.

За оваа изложба пратеникот пред неколку дена испратил писмо до Националната галерија и побарал да се повлечат конкретни експонати за кои рекол дека се богохулни, а паралелно побарал одговори и од министерката за култура на Грција, Лина Мендони. 

Изложбата поради која е предизвикан сериозниот инцидент е насловена „The Allure of the Strange – In-Between Space“.

Пападопулос и во декември 2023 година,  предизвика реакции кога рече дека на Божиќ демоните – „гоблини“ излегуваат од портите на пеколот и го напаѓаат Божјиот народ.