ВАР клучна поддршка за судиите: Судиските одлуки на мечот Вардар – Силекс се правилни
На натпреварот од 11. коло во Првата македонска фудбалска лига, помеѓу Вардар и Силекс, беа анализирани две судиски одлуки кои претставуваат предизвик и бараат точна проценка.
Во 85. минута, гостинскиот голман интервенираше надвор од казнениот простор без контрола на топката и намерно со двете раце го задржа противничкиот напаѓач, додека голот на гостите беше празен. Главниот судија правилно реагираше и покажа директен црвен картон за голманот.
Во втората ситуација, во 90+6 минута, главниот судија не можеше да ја види играта со рака од гостинскиот одбранбен играч поради блокирано видно поле. ВАР системот правилно интервенираше и по преглед на снимката беше досуден пенал за домашната екипа. Контактот со раката беше во неприродна положба, што го прави ризичен потег на одбранбениот играч. Дисциплинска мерка не беше потребна.
Судискиот одбор ја потврди исправноста на двете одлуки, а ВАР системот повторно се потврди како клучна поддршка за судиите во носењето точни и правични одлуки во најважните моменти од натпреварите.
