Убиецот на Росица бил пријавуван и од други четири поранешни девојки: Се што имал продал и потрошил да го одржи нивото кое го претставувал!
Убиецот на Росица од Велес бил пријавуван во скопските полициски станици уште пред 12 години. Хелсиншкиот комитет за Телма потврди дека располага со информации за четири други девојки кои од 2013 година наваму го пријавувале истиот човек, тврдејќи дека по прекин на врската продолжил да ги следи, вознемирува, им се јавува и остава навредливи пораки за нив и нивните блиски на јавни места.
Една од девојките за „Слободен печат“ раскажала за тортурата што ја доживеала во врската со Илија, која траела околу една и пол година во периодот 2013–2014. Таа сведочи дека не можела да се ослободи од него, а тој ѝ се заканувал дека ќе се самоубие доколку не му се врати. Во една прилика ѝ го одзел мобилниот телефон и испраќал пораки во нејзино име, а дури се заканувал и дека ќе ја убие нејзината сестра.
„Јас тие закани по живот ги пријавив во полиција. Го исконтактираа од таму и ми го врати телефонот. Во тие неколку часа тој се претставувал со мое име и праќал мејлови за да ми го уништи професионалниот развој“, изјавила девојката за „Слободен печат“.
На социјалните мрежи се појави и ново сведоштво за Илија Стефановски, во кое се опишува дека со години зад себе оставал низ случаи на вознемирување и омаловажување на девојки со кои бил во врска. Една жена сведочи дека пред околу десет години, кога нејзина пријателка раскинала со него поради љубомора, тој ѝ испратил експлицитни фотографии на факултетот во Холандија каде што студирала, вклучувајќи ги и професорите и колегите. Други жени, пак, пренесуваат дека во минатото користел и насилни методи, како физички напад и јавно изложување со експлицитни содржини.
Според сведоштвата, иако се претставувал со луксузен живот, Стефановски ги продал и потрошил становите и куќите кои ги поседувал, со цел да го одржи изгледот што го градел пред јавноста.
