ТВ24 по втор пат одбиена за национална терестријална лиценца за емитување – „телевизиите во Македонија се еднолични“
Телевизиите во Македонија се еднолични и од општ формат, а публиката бара детска програма, образовна програма, квалитетни играни серии и спорт, е заклучокот на Агенцијата за аудио и аудиовизуелни медиумски услуги (АВМУ) по направена студија за доделување на уште една терестријална лиценца на телевизија на цела територија на Македонија.
„Од тука произлегува дека не постои оправданост за општ формат, би ја дуплирале понудата, а бројот на медиуми дополнително би се зголемил“, образложи Магдалена Давидовска Довлева од АВМУ.
На пазарот има голем број на медиуми, а влошена е состојбата во однос на финаниската одржливост.
„Влошена е состојбата во однос на финансиската одржиливост на медиумите во Македонија. Ова е констатирано од спроедената Анализа за потребата од доделување на дозвола за емитување терестријално на уште една телевизија“, додаде Давидовска Довлева.
Денеска ТВ24 беше по втор пат одбиена за добивање на дозвола за емитување терестријално на територија на цела Македонија. По првата одлука ТВ24 се жалеше до Управниот суд кој одличи Агенцијата повторно да го разгледува нивното барање.
„Согласно наодите од студијата нема оправданост да се распише конкурс“, изјави директорот на АВМУ Зоран Трајчевски.
Членовите на Агенцијата коментираа дека за да се види економската состојба на Македонија и не треба да се изработува студија, туку доволно е да се оди во продавница и да се направи разлика од пред неколку години и сега.
„Има проблем со медиумите и гледаме дека по неколку на годишно ниво има кои се откажуваат. Тоа е поради економски причини“, рече еден од членовите на Советот.
Советот на Агенција со 5 гласа за и еден воздржан одби да распише нов оглас за телевизија која би добила лиценца за емитување на цела територија на Македонија преку неограничен ресурс на терестријален мултиплекс.
Препорака од Агенцијата е да се промени форматот на телевизијата која сака да добие лиценца за емитување на терестријално преку мултиплекс на територија на цела Македонија.
