Тошковски: Да работеле институциите, немаше да дојде до ова! Реткост е во Македонија да се постапува според сите професионални стандарди!
Министерот за внатрешни работи, Панче Тошковски, изјави дека во тек е активна истрага поврзана со еколошки криминал и најави дека за секој за кој ќе се докаже вмешаност ќе следуваат соодветни кривични пријави.
„Постојат индиции во она што го кажавте и вие, а за тоа зборуваа и премиерот и директорот на ДЗС. Во интерес на истрагата не би можел да споделам повеќе информации. Будни сме, присутни сме, МВР ги презема сите потребни дејствија,“ изјави Тошковски.
Министерот потврди дека е спроведен информативен разговор со четири лица, а дел од нив се под надзор на јавен обвинител кој предложил мерки за обезбедување на нивното присуство. „Истрагата ќе оди најдлабоко до каде што може да оди,“ додаде тој.
Тошковски потенцираше дека граѓаните заслужуваат безбедна и чиста Македонија и ги повика сите институции, особено Министерството за животна средина, да се вклучат со целосен капацитет:
„Да си ја работеле институциите работата како што треба, немаше да дојде до ова. Факт е дека изминатите 30 години беа диригирани, уништувани, запуштани, раководени од несоодветен кадар и нефокусирани кон преземање на надлежностите. Реткост е во Македонија да се постапува според сите професионални стандарди, како што постапуваме во оваа ситуација,“ истакна министерот.
